Le jeu de la Hache:
Copie de l'article de Jean-François Gilles de son site défunt: http://jfgilles.perso.sfr.fr/escrime/bibliotheque/jeu_de_la_hache/index.html
(Sfr.fr vient d'effacer son site en novembre 2016)
TEXTE FOURNIT POUR UN USAGE PRIVE OU POUR UN BUT DE RECHERCHE
LE JEU DE LA HACHE
BIBLIOTHEQUE NATIONALE MS FR. 1996 (XV-ième siècle)
Sensuit le prologue du Jeu de la hache pour soy habiliter et esuertuer en armes.
1. Considerant et voyant par experience que naturelment tous corps humains nobles et non nobles fuyent la mort et desirent viure longuement en ce mortel monde. Et apres au Royalme de paradis viure pardurablement. Pour paruenir et obtenir les desirs naturelz dessusdicts il me samble que toute creature humaine et raisonnable se deuroit tenir en bon estat et soy armer premierement de bonnes armures spirituelles cest assauoir de belles vertus pour soy deffendre et resister contre tous vices et temptations dyaboliques. en preseruant et gardant lame de mourir de mort eternelle. Et cela estre fait on doit armer le corps de bonnes armures corporelles et matierielles et soy pourueoir de glaiues conuenables. comme la hache, la demy lance, la dague, la grande espee et la petite pour soy deffendre et resister contre ses ennemis corporelz et mortelz. Et pour ce que tout homme noble de corps et de courage naturelment desire dexcerciter et habilliter sa personne en occuppacion vertueuse et honnourable. Et principalment ou noble fait darmes cest assavoir au Jeu de la hache dont procedent et despendent plusieurs glaiues dessus nommez. Daultre part ledict Jeu est honnourable et proffitable pour la preseruation du corps humain noble ou non noble. Pour les raisons dessusdictes jay employe mon petit entendement a mettre par escript aucunes doctrines et enseignemens touchant ledict Jeu de hache en la maniere que sensuit.
2. Et premierement vous qui estes lung des ij champions appelle en champ de battaille soit a oultrance ou aultrement soyes attendant ou deffendant sur tout deuez sentir en vostre conscience auoir bonne et iuste querelle.
3. Item au partir de vostre pauillon deuez estre bien arme et embatonne de vostre hache darmes et daultres glaiues appertenans. En vous recommandant a dieu deuez faire le signe de la croix et marchier droit dune belle contenance et valereuse. en regardant vers lautre bout du parcq pour veoir vostre adverssaire. Et en le regardant deuez prendre amodereement ung fier courage en vous pour battaillier vaillamment comme il appertient. Et auoir souuenance des principaulx poins contenus es chappittres qui cy apres sensuiuent.
Cy commence la doctrine et lindustrye du noble Jeu de la hache et la maniere de battaillier.
4. Item quant on vous donra de tour de bras droittier a droittier. se vous auez la croix au deuant vous pouez marchier auant du pie gauche en luy receuant son coup en cueillant de la queue de la hache dune venue ferez contre bas pour la luy faire cheoir a terre. Et de la pouez en marchant lung pie apres lautre en suyuant luy baillier destocq de ladicte queue en coulant par la main gauche au visage. ou la ou bon vous samblera. ou luy baillier a tour de bras sur la teste.
5. Item se vous auez la queue deuant le pouez pareillement faire sans vous bougier.
6. Item encore se vous auez la croix deuant comme dessus pouez receuoir ledict coup de la queue de la vostre en desmarchant en arriere. de toutes les trois couuertes pouez donner lesdicts coups de tours de bras et de lestocq de la queue.
7. Item vne aultre couuerte de tour de bras, se vous auez la queue deuant sans vous bougier ne desmarchier. Ruez au deuant de sa hache de la croix de la vostre pour la trouuer en croisee seullement quil puisse soustenir le coup quil ne dessende sur vous. Et Incontinent la croisee faite destornez vostre hache en luy ruant de la queue de bas en hault en fauchant entre sa main et la croix de la sienne grant coup pour la luy faire cheoir hors de sa main. Et se faillies que soyes prestement retourne en vostre garde. Et se vous la luy auez fait saillir de la main vous pouez faire ce que bon vous samblera de tour de bras ou aultrement.
8. Item se vous luy rues le premier de tour de bras et quil se queure de la fasson dessusdicte vous pouez faire pareillement de la queue comme du sien dessusdict.
9. Item se de rechief venoit a vous du tour de bras et que ayes la queue deuant deuez marchier a lencontre du coup le coste droit de vostre homme et de la receuoir de demye hache son coup. et tout d'une venue le plus pres que pourrez deuez marchier de lautre pie gauche et lassoir darriere son tallon bien ferme en luy sourdant sa hache qui est dessus la vostre. et mettre la queue de la vostre soubz son menton et de la donner une secousse en darriere pour le ruer par terre.
10. Item se vous faillies vous deuez retourner sur vostre garde. et cela se doit faire prestement.
11. Item sil vous faisoit ceste entree dessusdicte. vous deuez mettre prestement la dague de vostre hache soubz son esselle pour lesloignier de vous ou repasser la croisee de vostredicte hache par soubz son bras pour le pousser de dessoubz lesselle de la demy hache en le suyuant pour le mettre hors de la lisse. ou donner bonne secousse de la force de vos bras seullement pour sentir se le pourrez getter par terre.
12. Item aultre couuerte de tours de bras, vous estant sur la garde de la queue sans vous bougier pouez receuoir demy hache tant que vos bras se pouuront estendre en hault. Et incontinent le coup receu pouez de la queue de la vostre cueillir la sienne, ainsi quil la vouldra leuer. et tout dune venue la ruer en auant. Et se elle ne vole hors de sa main au mains vous lesbranleuez tellement que aurez temps pour donner coup ou estocq.
13. Item se il vient la croix deuant pour vous estocquer. de la queue de la vostre luy deuez destourner la sienne le plus souuuent que pourrez. Et se la pouez tellement destourner que le puissez veoir descouuert entre luy et sa hache pouez ruer lestocq de la queue au visage. Et ce coup est bon et seur a poursuiuir car il ne vous en puet mesaduenir, et vous deuez approchier de luy joindre vostre bras gauche au sien droit. Et se vous voyes que bon vous soit et que en ayes le loisir pouez laisser couler la queue de la vostredicte hache soubz son menton ayant vostre pie darriere son talon. et de la essayer a le renuersser.
14. Item Il puet deffaire ceste entree en destournant sa croisee de sa hache par soubz la queue de la vostre. et de sa ditte croisee deboutter en auant de soy vostredicte queue. Et en faisant cestedicte deffaite vous puet suyure lung pie chassant lautre pour entrer vous et vostredicte queue affin de vous estocquer au visage.
15. Item sil vous fait ladicte poursuite nauez que a vous retraire lung pie apres lautre ung pas en arriere et retirer aussy en coulant par la main gauche vostre hache a vous. Et en ce faisant vous vous trouuens despechie et dauantage serez sur la garde de vostredicte queue.
16. Item se vos haches sont iointes lune croix contre lautre et que il vous boutte pour vous reculler pouez desmarchier seullement du pie deuant a demy pour retirer vostre hache a vous. Et incontinent mettre la dague de la vostre entre son becq de faulcon et sa main le plus pres de la croix que pourrez du coste deuers son bras droit en luy bouttant sa hache daultre coste en suyuant pouez marchier du pie gauche vers son darriere en le bouttant de demy hache contre ses espaulles et le ruer par terre.
17. Item plus se il vient a vous la dague de sa hache deuant pour vous baillier de lestocq et que vous ayes vostre hache pareillement auec la sienne, quant le verrez venir a vous pouez marchier sur son darriere le plus que pourres affin quil ne treuue rien deuant luy. en faisant ceste desmarche deuez boutter du plat de la queue de vostre hache sur son col pour le faire tresbuchier en auant. Et se faillies tournez prestement sur la garde de vostre hache.
18. Item se il vous vouloit donner de la dague de sa hache au visage en coulant deuez de la queue de la vostre destourner le coup rudement pour essayer se la pourrez faire cheoir.
19. Item se il est joueur de la hache et qu'il viengne la queue de sa hache deuant deuez essayer se de la dague de la vostre luy pourries de coup darriere main faire perdre la sienne dune main. Et se le pouez faire vous pouez deschergier sur luy telz coups que vous samblera.
20. Item se vous faillies vous deuez essayer a luy donner de lestocq de la queue au visage pour luy faire hausser la queue de la sienne. Et se vous la pouez trouuer croisee contre la vostre vous pouez retirer la queue de la vostre en luy baillant du mail contre le coste la sienne. ou en marchant en darriere luy en baillier sur la teste.
21. Item se il vous vouloit faire deuez baisser la queue de la vostre en desmarchant en arriere du pie gauche en vous couurant demy hache ou du mail. et puis tourner sur la garde du quel bout que bon vous samblera.
22. Item en quelque garde que ce soit vous pouez essayer a luy donner sur la teste. non pas que se vous faillies que vostre hache passast oultre. car il y auroit peril. Et incontinent ce coup fait deuez faire samblant de retourner sur la teste affin quil se queuure hault, et a dont luy pouez donner sur le genoul du becq de faulcon. Et se vostre becq de faulcon passe lescreuisse de son genoil deuez tirer a vous pour le ruer par terre. Et se il desmarche que vous ne trouuez rien gardez que vostre hache ne passe plus avant que vostre homme, et pareillement en tous vos coups de tour de bras et prestement tournez en vostre garde.
23. Item et se on faisoit ledict coup de genoul deuez marchier en auant le coste droit vers vostre homme en luy mettant la queue de vostre hache entre sa hache et vostre genoul, et de la vostredicte queue deuez essayer a luy errachier de ses mains en donnant darriere main bonne secousse contre la croisee de la sienne. Et se ne pouez de la approchies de luy en suyuant lung pie apres lautre, et luy donnez de lestocq de la dague de la vostre au visage.
24. Item se il tient sa hache la queue deuant, frapper grant coup de la queue de la vostre arriere main contre la sienne pour la faire saillir hors de la main. Et se ne pouez auecques le coup marchant en auant entre luy et sa hache le pouez frapper de lestocq de la dague au visage.
25. Item se il le vous faisoit deuez baisser la queue de la vostre pres de vos pies et desmarchies en arriere et de demy hache destourner la sienne de deuant vostre visage et demourez en vostre garde sur la dague. Et puis pouez desmarchier et tourner sur la garde de laquelle se bon vous samble et souvent le deuez arguez de ces estocs puis sur le pie puis sur la main et au visage et quil ne treuue point vostre hache au ferme que vous puissez se non a vostre requeste pour faire aucune entree.
26. Item se Il vient a vous la queue deuant et quil la tienne haulte pouez mettre la queue de la vostre en marchant sur son coste gauche de dessoubz son bras et que la queue passe par soubz la sienne hache entre ses deux mains et tirer vers sa main bonne secousse pour la luy faire perdre dune main. Et de la pouez boutter de demy hache en son coste pour le getter par terre, au mains le ferez vous marchier auant et aurez assez loisir de hausser de tour de bras sur luy.
27. Item se Il vous fait ceste mesme chose vous nauez a faire que de lachier a coup la main basse, et de reprendre a coup vostre hache plus hault en desmarchant et tourner sur vostre garde.
28. Item se il dessaisoit ceste prinse que luy aurez faite en la maniere dessusdicte et quil fust sur la garde de la dague pouez pareillement mettre la queue de la vostre soubz sa demy hache en marchant visage contre visage et passer vostredite queue par dessus son bras droit et donner bonne secousse pour luy faire perdre le gros bout de sa hache, et de la aurez loisir de donner coup ou estocq.
29. Item et se vous venez croiser vos haches a demy a pousser lung lautre faites que en croisant vous ayes la croix de la vostre plus hault que la queue et en poussant tournez vostre bec de faulcon vers sa hache pour la tirer a vous en desmarchant de la force de tous vos bras seullement acrochies ledict becq de faulcon au millieu de sa hache et sera pour luy faire perdre sa hache.
30. Item se il ne chiet ou ne pert sa hache au mains vendra il ung pas apres vous, a dont remarchies au deuant en luy baillant au visage de lestocq et puis tournez en vostre garde.
31. Item se il vous fait la pareille prinse lachies vostre main de dessoubz et il ne fera rien.
32. Item vous la pouez aultrement deffaire en le suyuant en son tirer marchies en auant ainsy quil tirera, et de la pourrez en marchant du pie gauche sur son coste droit getter la queue de la vostre sur son col en le verssant comme me dessus est dit en la parade de demy hache.
33. Item se il le vous fait ia en sauez vous la deffaire en ladicte parade de demy hache.
34. Item se il vous donnoit de lestocq de sa queue au pie vous deuez leuer vostre pie en luy donnant de vostre queue contre la sienne pour le destourner et faire saillir hors de sa main se pouez. Et fait ou non vous luy pouez donner prestement sans vous bougier du mail de la hache sur la teste et sur les mains a vostre auantage.
35. Item se vos deux haches sont en croix des ii queues, faites se vous pouez quil hausse la queue de la sienne bien hault et de la pouez baisser le bout de la queue de la vostre en la retirant ung peu coulant par la main tant que la puissez repasser par dessoubz la sienne sans esloignier que le mains que pourrez, et de la frapper darriere main contre la sienne pour essayer se la pourrez faire eschapper de la main au mains la desuoyer par fasson que puissez entrer entre luy et sa hache en marchant sur son coste gauche. Et de la pouez boutter de demy hache sur la coste pour le ruer par terre.
36. Item pour vous garder quil ne le vous face gardez quil ne treuue vostre hache en croisee au mains que la vostre ne soit darriere la sienne et ne la tenez guieres en ung lieu.
37. Item se dauenture il le vous faisoit vous vous en poes deffaire en dressant vostre hache pres de vous et passer vostre queue par bas entre vous et luy et de la la sourdre a lencontre de son estommacq et le deboutter de vous.
38. Item aultre deffaite sil le vous faisoit Il vous fault dresser vostre hache loing de vous et de la la hausser encontre son estommacq en vous redressant contre luy et le deboutter de vous.
39. Item se vous le pouez a coup bien faire en vous tournant pouez getter le beq de faulcon en son col et tirer a vous veoir se le pourrez desroquer.
40. Item se il le vous fait deuez marchier du pie droit en auant en bouttant demy hache la sienne loing de vous et pouez demourer en vostre garde.
41. Item se de rechief les queues desdictes haches sont croisees deuez pousser de la vostre la sienne en la mettant dessoubz la vostre tant quee vous layes fait baisser si bas que ayes fait passer lesdictes queues sur vostre coste gauche tant que ayes loisir de marchier du pie droit sur son darriere et de la le pouez demy hache pousser contre les espaulles grant coup. Ou sil vous a le darriere tant tourne que puissez auoir le plat des espaulles vous le pouez boutter de ladicte demy hache en le suyuant bien prestement puis sur lung coste puis sur lautre selon que pourrez apperceuoir du quel coste il veult retourner contre vous, alors bouttez contre ceste espaulle, et sil veult tourner daultre coste poussez sur lautre sans bougier vostre demy hache de dessus son dos. Et en ce faisant le pouez mettre de dehors la lisse.
42. Item se Il vous faisoit cestedicte entree. Incontinent que vous lapperceurez desuoyes la vostre sur la sienne et il ne trouvera rien.
43. Item se il vient a vous le visage deuant le pouez estocquer au visage de la queue de vostre hache ou au pie quil na point de couuerte ou vous pouez tirer plusieurs aultres coups.
44. Item se il venoit comme dessusdict le visage deuant vous luy pouez donner dung estocq de la queue au visage affin quil hausse sa hache, et se il la tient loing de luy vous pouez mettre la queue de la vostre par dessoubz sa demy hache droit encontre son col et le boutter. Et se ne trouvez vostre auantage a boutter passez ladicte queue par sus sa teste pour le prendre a lautre coste du col a tirer arriere. Et se faillies que ne le puisses pousser de la tirez en suyuant vos pas en arriere et vous ne trouuerez point dempeschement.
45. Item se il vous faisoit ladicte prinse vous pouez boutter a demy hache encontre son col ou son espaulle et de le deboutter de vous.
46. Item se Il la vous deffaisoit en ceste maniere vous deuez obeyr a reculler et en vous recullant deuez trauersser ladicte queue de vostre hache par dessus son bras droit en tirant grant secousse pour la luy faire perdre du gros bout.
47. Item une aultre deffaite. Incontinent que sa queue sera sur vostre col lachies vostre main gauche et reprenez vostre hache plus hault par dessus la sienne en vous desmarchant en arriere qui est bonne et seure deffaite.
48. Item se il tient la queue haulte, vous la deuez tenir hault comme luy mais autant hault lung bout comme lautre affin de non monstrer le creux de la main que le mains que vous pouez, et de la vous pouez garder se son estocq sil vous tiroit au visage.
49. Item se il tenoit la queue de sa hache plus hault que la croix il monstre le creux de sa main dont vous luy pouez donner de lestocq de vostredicte queue au creux de la main.
50. Item se il vient a vous comme deuant le visage deuers vous pour vous boutter demy hache ou aultrement, se pouez approchier de luy vous pouez mettre la queue de vostre hache entre ses cuisses le plus auant que pourrez et lors leuez le gros bout que tenez en la main de toute vostre puissance pour le sourdre hault et luy se perdre terre.
51. Item se ainsy le faites force luy est de tumber en arriere, et se il le vous vouloit faire nauez a faire que prestement mettre la demy hache contre son col ou son espaule et cela le gardera de pouoir leuer sy grans fais.
Cy commence Le Jeu du gauchier au droittier & premierement.
52. Item se le gauchier vient a vous donner de tour de bras deuez desmarchier du pie gauche en auant en ruant la queue de vostre hache au deuant de son coup affin que le coup ne tumbe sur vous, et de la couuerte faite prestement deuez retirer la queue a vous en ruant du mail de vostredicte hache encontre le dos de la sienne pour luy ayder a sen aler auecques son branle dont il vous cuide ferir, ou pour luy faire eschapper du gros bout de sa main.
53. Item se il auoit retire sa hache sy a coup quil vous conuenist faillir retirez vous prestement sur la garde de vostre queue.
54. Item se ledict gauchier vous vient donner de tour de bras en quelque garde que vous soyes desmarchies ung pas en arriere et il ne trouuera rien.
55. Item se vous ruez a tour de bras a vostre gauchier se il se treuue se sa queue en la fasson dessusdicte Incontinent le coup fait donnez de la queue de la vostre contre le darriere de la sienne grant coup pour essayer a la luy se perdre dune main, mais perdre ou non vous pouez auecques ledict coup a tant marchier du pie gauche en auant darriere son talon et luy mettant la queue de la vostre par dessoubz le menton pour le reuersser se pouez, se ne pouez rien faire tourner vous prestement en vostre garde, en vous retirant suyuant vos pas ainsy demourrez sur la garde de vostre queue.
56. Item se il vous faisoit cestedicte entree, nauez a faire que tirer vostredicte queue par dessoubz la sienne et la hausser en la mettant a luy pareillement comme il la a vous auoit mise et en ce faisant deffaites sa prinse.
57. Item il la puet deffaire quant lauries reffaite en la maniere dessusdicte et tant que vous auez la vostre hache soubz son menton auez le bras hault, et de la vous puet mettre a demy hache dessoubz vostre esselle, et vous puet pousser bien fort. Et pareillement la luy pouez faire sil vous faisoit ladicte entree. Et pour ce fait ou failly ny deuez point seiourner.
58. Item et pour deffaire ceste dite bouttee soubz lesselle. Incontinent que la sentirez vous pouez lachier a coup vostre main gauche et mettez vostre bras par entre sa demy hache quil tient loing de luy pour vous boutter et son corps et faites tantost dune venue que luy mettez la main par le fourc et le haussez hault pour le desroquer.
59. Item se il le vous faisoit deuez a coup lachier la main gauche de la queue de vostre hache et reprendre de ceste main gauche la croix de vostredicte hache en coulant la main droite contre bas et de la pousser contre son col et il naura pouoir de vous hausser.
60. Item se ledict gauchier vient a vous la dague de sa hache deuant pour estocquer au visage ou en aultre lieu au dessus de la sainture pouez tourner de la queue de la vostre souuent deuant son visage pour luy troubler son avis quil auroit entreprins de fairee quelque coup et de la pouez tirer coup de mail sur la teste de hault en bas ainsy se failliez que vostre hache ne vous emporte tant quil vous conuenist luy tourner le dos qui seroit grant peril.
61. Item sil se couuroit de la croisee de la hache pour le premier coup faites samblant de recouurer ung aultre coup affin quil se queuure hault comme deuant pour garder sa teste, de la tirez grant coup par le genoul et bien auant affin que sil desmarchoit que la hache treuue lautre genoul par dedens jambes. Et sil ne desmarchoit deuez tirer grant secousse a vous affin que vostre becq de faulcon sacroche a son genoul pour le ruer par terre. Et se vous pouez ne tirez pas ce coup audessoubz de lescreuisse, mais en lescreuisse ou au dessus affin que se vous failliez a le desroquer que vous le puissez desarmey de quelque piece de cuissot.
62. Item se il le vous faisoit nauez a faire que desmarchier du pie gauche qui est darriere et le mettre deuant lautre pour hurter du genoul le millieu de sa hache pour vous desenferrer.
63. Item de la le pouez de la queue de vostre hache estocquer au visage qui est bonne deffence. Et pour ce quant ferez ledit coup faites le prestement, et se vous faillies tournez vous a coup en vostre garde.
64. Item se ledict gauchier vient a vous la dague au deuant de rechief deuez de la queue de la vostre deboutter la croix de la sienne puis sa puis la. Et en ce faisant pouez mettre vostredicte queue contre la croix de la sienne sur le manche par deuers son corps et deuez laisser couler de la main gauche ladicte queue encontre la croix de le sienne tellement que ayes force de la esloignier en arriere main. Et en faisant ceste coulisse droitement deuez marchier de vostre pie droit sur son darriere pres de luy et tout dune venue deuuez boutter a demy hache vostre grant bout pour essayer se le boutterez a terre, ou au mains se desmarchera il et pouez faire coup.
65. Item se il le vous faisoit deuez si prestement que vous vous sentez enferre baisser le gros bout de vostre hache en la tournant par dessoubz la queue de la sienne sans guieres la esloignier et tant que vostredicte hache viengne sur la darriere de sa queue. Et de la pouez esbranler tant que aurez loisir de desmarchier en arriere pour tourner en la garde de la queue car elle est plus auantageuse que celle de la dague.
66. Item se vos queues sont ioinctes en croix les pouez affermer ensamble affin quil asseure la sienne. Et de la deuez desmarchier en arriere de vostre pie gauche, et en desmarchant tirez ung coup du mail en coulant sur ses mains et cest ung bon coup mais que la vostre queue soit darriere la sienne. Et pour vous garder de coup gardez que iamais il nayt la sienne darriere la vostre car se il la deuant il ne le vous puet faire pour la queue de la vostre qui len garde.
67. Item vous pouez tousiours ayant vostre queue darriere la sienne en la debouttant ung peu en auant luy tirer destocq par le visage.
68. Item se ledict gauchier vient a vous la dague deuant et quil tiengne sa hache longue vous pouez mettre la queue de la vostre en croisee entre sa main et la + et de la tirer en arriere main contre bas pour la faire passer sur vostre darriere en marchant du pie droit en auant le pouez boutter demy hache contre ses espaules pour le desroquer.
69. Item gardez que iamais il ne puisse aduenir a appuyer croisee de sa queuure contre le deuant de la vostre, ou se dauenture il faisoit prestement quil aura appuye destournez la vostre par sus la sienne et ne le pourra faire.
70. Item se vostre homme vient a vous sur la garde de la queue et quil la tienne comme basse pouez frapper de vostre queue contrre la sienne auant main pour la esloignier sur son deuant. Et se le pouez faire en suyuant lung pie apres lautre pouez vous mettre entre sa hache et luy et de la deuez mettre vostredicte queue entre ses cuisses iusques a demy et deuez subleuer vostre homme sur ladicte queue le plus hault que pourrez. Et pouez faire cestedicte prinse de plusieurs aultres entrees ne plus ne mains comme deuant est mis au Jeu de droittier a droittier.
71. Item se il le vous faisoit deuez mettre a demy vostre hache entre sa poitrine et naura pouoir de la faire.
72. Item se vostre homme vient a vous le visage deuant soit droittier ou gauchier se pouez mettre la queue de vostre hache par sus la sienne et en mettre le bout sur lesselle droite le pouez pousser du coste de ladicte queue en le suyuant tousiours sans quil y ait guieres bon remede de se desenserrer et par cela le pouez mettre hors de la lisse.
73. Item le deuez souuent arguer destocz par le visage et par les pies pour luy faire perdre son aduis.
FIN.
jf-gilles.com 2001
Un autre internaute tente d'en faire une traduction en français moderne ici: http://gramhe.podshows.fr/amhe/hache-noble/le-jue-de-la-hache-travail-en-cours/